ਸ਼੍ਰੀ ਮਨੋਹਰ ਲਾਲ ਨੇ ਹਿਊਸਟਨ ਵਿੱਚ ਭਾਰਤੀ ਭਾਈਚਾਰੇ ਨਾਲ ਹਿੰਦੀ ਦਿਵਸ ਮਨਾਇਆ
ਨਾਸਾ ਦੇ ਜੌਨਸਨ ਸਪੇਸ ਸੈਂਟਰ ਦਾ ਦੌਰਾ ਕੀਤਾ; ਜੀ20 ਊਰਜਾ ਭਰਪੂਰਤਾ ਮੰਤਰੀ-ਪੱਧਰੀ ਬੈਠਕ ਤੋਂ ਪਹਿਲਾਂ ਭਾਰਤੀ ਪ੍ਰਵਾਸੀ ਭਾਈਚਾਰੇ ਨਾਲ ਗੱਲਬਾਤ ਕੀਤੀ
PIB Chandigarh/Rozana Reporter
ਕੇਂਦਰੀ ਬਿਜਲੀ ਅਤੇ ਆਵਾਸ ਤੇ ਸ਼ਹਿਰੀ ਮਾਮਲਿਆਂ ਦੇ ਮੰਤਰੀ ਸ਼੍ਰੀ ਮਨੋਹਰ ਲਾਲ ਨੇ 13 ਸਤੰਬਰ, 2026 ਨੂੰ ਕਈ ਪ੍ਰੋਗਰਾਮਾਂ ਵਿੱਚ ਹਿੱਸਾ ਲਿਆ, ਜੋ ਪ੍ਰਵਾਸੀ ਭਾਰਤੀਆਂ ਨਾਲ ਭਾਰਤ ਦੇ ਸੱਭਿਆਚਾਰਕ ਜੁੜਾਅ, ਵਾਤਾਵਰਣ ਸੰਬੰਧੀ ਜ਼ਿੰਮੇਵਾਰੀ ਪ੍ਰਤੀ ਵਚਨਬੱਧਤਾ ਅਤੇ ਉੱਭਰਦੇ ਖੇਤਰਾਂ ਵਿੱਚ ਭਾਰਤ-ਅਮਰੀਕਾ ਸਹਿਯੋਗ ਦੇ ਵਿਸਥਾਰ ਨੂੰ ਦਰਸਾਉਂਦੇ ਹਨ। ਸ਼੍ਰੀ ਮਨੋਹਰ ਲਾਲ ਜੀ20 ਊਰਜਾ ਭਰਪੂਰਤਾ ਮੰਤਰੀ-ਪੱਧਰੀ ਬੈਠਕ ਵਿੱਚ ਹਿੱਸਾ ਲੈਣ ਲਈ ਫ਼ਿਲਹਾਲ ਹਿਊਸਟਨ, ਅਮਰੀਕਾ ਵਿੱਚ ਹਨ।ਸ਼੍ਰੀ ਮਨੋਹਰ ਲਾਲ ਨੇ (13 ਸਤੰਬਰ 2026) ਹਿਊਸਟਨ ਸਥਿਤ ਭਾਰਤੀ ਵਣਜ ਦੂਤਾਵਾਸ ਵੱਲੋਂ ਅੰਤਰਰਾਸ਼ਟਰੀ ਹਿੰਦੀ ਸੰਘ – ਹਿਊਸਟਨ ਸ਼ਾਖਾ ਦੇ ਸਹਿਯੋਗ ਨਾਲ ਕਰਵਾਏ ਗਏ ਹਿੰਦੀ ਦਿਵਸ 2026 ਪ੍ਰੋਗਰਾਮ ਵਿੱਚ ਹਿੱਸਾ ਲਿਆ। ਇਸ ਆਯੋਜਨ ਵਿੱਚ ਹਿੰਦੀ ਦੀ ਖ਼ੁਸ਼ਹਾਲੀ, ਸਮਾਵੇਸ਼ੀਤਾ ਅਤੇ ਜੀਵੰਤਤਾ ਦਾ ਜਸ਼ਨ ਮਨਾਇਆ ਗਿਆ ਅਤੇ ਪੂਰੇ ਖੇਤਰ ਦੇ ਹਿੰਦੀ ਪ੍ਰੇਮੀਆਂ ਨੂੰ ਇਕੱਠਾ ਲਿਆਂਦਾ ਗਿਆ। ਸ਼੍ਰੀ ਮਨੋਹਰ ਲਾਲ ਨੇ ਇਕੱਠ ਨੂੰ ਸੰਬੋਧਨ ਕੀਤਾ ਅਤੇ ਹਿੰਦੀ ਨੂੰ ਉਤਸ਼ਾਹਿਤ ਕਰਨ ਅਤੇ ਭਾਰਤ ਤੇ ਭਾਰਤੀ ਪ੍ਰਵਾਸੀਆਂ ਵਿਚਕਾਰ ਸੱਭਿਆਚਾਰਕ ਸਬੰਧਾਂ ਨੂੰ ਮਜ਼ਬੂਤ ਕਰਨ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ।ਭਾਰਤ ਦੇ ਵਣਜ ਦੂਤਾਵਾਸ ਵਿੱਚ ਆਪਣੀ ਫੇਰੀ ਦੌਰਾਨ ਸ਼੍ਰੀ ਮਨੋਹਰ ਲਾਲ ਨੇ ‘ਇੱਕ ਪੇੜ ਮਾਂ ਕੇ ਨਾਮ’ ਪਹਿਲ ਦੇ ਤਹਿਤ ਇੱਕ ਪੌਦਾ ਲਗਾਇਆ। ਇਸ ਪੌਦੇ ਲਗਾਉਣ ਦੇ ਨਾਲ ਹੀ ਵਣਜ ਦੂਤਾਵਾਸ ਵਿੱਚ ‘ਸਵੱਛਤਾ ਹੀ ਸੇਵਾ 2026’ ਦੀ ਸ਼ੁਰੂਆਤ ਵੀ ਹੋਈ, ਜੋ “ਸਵੱਛਤਾ ਵਿੱਚ ਸਹਿਭਾਗ, ਸਵੱਛ ਭਾਰਤ, ਵਿਕਸਿਤ ਭਾਰਤ” ਵਿਸ਼ੇ (ਥੀਮ) ਨਾਲ ਮਨਾਏ ਜਾ ਰਹੇ ਰਾਸ਼ਟਰੀ ਅਭਿਆਨ ਦਾ ਹਿੱਸਾ ਹੈ ਅਤੇ ਜਨ-ਭਾਗੀਦਾਰੀ ਤੇ ਵਾਤਾਵਰਣ ਸੰਬੰਧੀ ਜ਼ਿੰਮੇਵਾਰੀ ਦੇ ਮੁੱਲਾਂ ਨੂੰ ਮਜ਼ਬੂਤ ਕਰਦਾ ਹੈ।
ਸ਼੍ਰੀ ਮਨੋਹਰ ਲਾਲ ਨੇ 13 ਸਤੰਬਰ, 2026 ਨੂੰ ਨਾਸਾ ਦੇ ਹਿਊਸਟਨ ਸਥਿਤ ਜੌਨਸਨ ਪੁਲਾੜ ਸੈਂਟਰ ਦਾ ਦੌਰਾ ਕੀਤਾ। ਉਨ੍ਹਾਂ ਨੇ ਕੇਂਦਰ ਦਾ ਦੌਰਾ ਕੀਤਾ ਅਤੇ ਅੰਤਰਿਕਸ਼ ਖੇਤਰ ਵਿੱਚ ਭਾਰਤ-ਅਮਰੀਕਾ ਸਹਿਯੋਗ ਨੂੰ ਹੋਰ ਮਜ਼ਬੂਤ ਕਰਨ ਦੇ ਮੌਕਿਆਂ ‘ਤੇ ਚਰਚਾ ਕੀਤੀ। ਸ਼੍ਰੀ ਮਨੋਹਰ ਲਾਲ ਨੇ ਹਿਊਸਟਨ ਪੁਲਾੜ ਖੇਤਰ ਦੇ ਪ੍ਰਧਾਨ ਅਤੇ ਸੀ.ਈ.ਓ. ਸ਼੍ਰੀ ਵਿਲੀਅਮ ਟੀ. ਹੈਰਿਸ ਦਾ ਗਰਮਜੋਸ਼ੀ ਨਾਲ ਸਵਾਗਤ ਕਰਨ ਅਤੇ ਯਾਤਰਾ ਦੌਰਾਨ ਨਿੱਜੀ ਤੌਰ ‘ਤੇ ਮਾਰਗਦਰਸ਼ਨ ਕਰਨ ਲਈ ਧੰਨਵਾਦ ਕੀਤਾ।
ਸ਼੍ਰੀ ਮਨੋਹਰ ਲਾਲ ਨੇ 13 ਸਤੰਬਰ, 2026 ਦੀ ਸ਼ਾਮ ਨੂੰ ਹਿਊਸਟਨ ਸਥਿਤ ਇੰਡੀਆ ਹਾਊਸ ਵਿੱਚ ਭਾਰਤੀ ਪ੍ਰਵਾਸੀ ਭਾਈਚਾਰੇ ਵੱਲੋਂ ਕਰਵਾਏ ਗਏ ਇੱਕ ਜਨਤਕ ਸਵਾਗਤੀ ਸਮਾਗਮ ਵਿੱਚ ਹਿੱਸਾ ਲਿਆ। ਇਸ ਸਵਾਗਤੀ ਸਮਾਗਮ ਵਿੱਚ ਭਾਈਚਾਰੇ ਦੇ ਵੱਖ-ਵੱਖ ਵਰਗਾਂ ਦੇ ਨੁਮਾਇੰਦੇ ਮੌਜੂਦ ਸਨ, ਜਿਨ੍ਹਾਂ ਵਿੱਚ ਪੇਸ਼ੇਵਰ, ਉੱਦਮੀ, ਵਿਦਿਆਰਥੀ, ਸੱਭਿਆਚਾਰਕ ਆਗੂ ਅਤੇ ਖੇਤਰੀ ਸੰਗਠਨਾਂ ਦੇ ਨੁਮਾਇੰਦੇ ਸ਼ਾਮਲ ਸਨ। ਕੌਂਸਲ ਜਨਰਲ ਸ਼੍ਰੀ ਡੀ.ਸੀ. ਮੰਜੂਨਾਥ ਨੇ ਸ਼੍ਰੀ ਮਨੋਹਰ ਲਾਲ ਦਾ ਸਵਾਗਤ ਕੀਤਾ ਅਤੇ ਜੀ20 ਊਰਜਾ ਸਮ੍ਰਿੱਧੀ ਮੰਤਰੀ-ਪੱਧਰੀ ਬੈਠਕ ਦੌਰਾਨ ਭਾਰਤੀ ਪ੍ਰਵਾਸੀ ਭਾਈਚਾਰੇ ਨਾਲ ਉਨ੍ਹਾਂ ਦੀ ਗੱਲਬਾਤ ਦੀ ਸ਼ਲਾਘਾ ਕੀਤੀ।
ਇਸ ਦੌਰਾਨ, ਹਰਿਆਣਵੀ ਭਾਈਚਾਰੇ, ਜਿਸ ਦੀ ਨੁਮਾਇੰਦਗੀ ਐੱਚਏਆਰਆਈਟੀ ਨੇ ਕੀਤੀ, ਨੇ ਵੀ ਸ਼੍ਰੀ ਮਨੋਹਰ ਲਾਲ ਨਾਲ ਗੱਲਬਾਤ ਕੀਤੀ। ਸ਼੍ਰੀ ਮਨੋਹਰ ਲਾਲ ਨੇ ਭਾਰਤ ਅਤੇ ਸੰਯੁਕਤ ਰਾਜ ਅਮਰੀਕਾ ਵਿਚਕਾਰ ਮਜ਼ਬੂਤ ਤੇ ਸਥਾਈ ਜਨ-ਸਬੰਧਾਂ ਅਤੇ ਦੇਸ਼ ਦੇ ਆਰਥਿਕ, ਸੱਭਿਆਚਾਰਕ ਅਤੇ ਸਮਾਜਿਕ ਤਾਣੇ-ਬਾਣੇ ਵਿੱਚ ਭਾਰਤੀ ਪ੍ਰਵਾਸੀਆਂ ਦੇ ਬਹੁਮੁੱਲੇ ਯੋਗਦਾਨ ਦੀ ਸ਼ਲਾਘਾ ਕੀਤੀ।
13 ਸਤੰਬਰ 2026 ਨੂੰ ਹੋਏ ਸੰਮੇਲਨਾਂ ਵਿੱਚ ਭਾਰਤ-ਅਮਰੀਕਾ ਸਬੰਧਾਂ ਦੇ ਬਹੁ-ਪੱਖੀ ਪਹਿਲੂਆਂ ਨੂੰ ਦਰਸਾਇਆ ਗਿਆ, ਜਿਨ੍ਹਾਂ ਵਿੱਚ ਜੀ20 ਸਹਿਯੋਗ, ਸੱਭਿਆਚਾਰਕ ਤੇ ਜਨ-ਜਨ ਸਬੰਧ, ਵਾਤਾਵਰਣ ਸੰਬੰਧੀ ਜ਼ਿੰਮੇਵਾਰੀ ਅਤੇ ਉੱਨਤ ਤਕਨਾਲੋਜੀ ਤੇ ਪੁਲਾੜ ਵਿੱਚ ਸਹਿਯੋਗ ਸ਼ਾਮਲ ਹਨ।
ਸ਼੍ਰੀ ਮਨੋਹਰ ਲਾਲ ਆਉਣ ਵਾਲੇ ਤਿੰਨ ਦਿਨਾਂ (14-16 ਸਤੰਬਰ 2026) ਦੌਰਾਨ, ਜੀ20 ਊਰਜਾ ਭਰਪੂਰਤਾ ਮੰਤਰੀ-ਪੱਧਰੀ ਬੈਠਕ ਵਿੱਚ ਹਿੱਸਾ ਲੈਣਗੇ, ਜਿਸ ਵਿੱਚ ਜੀ20 ਮੈਂਬਰ ਦੇਸ਼ਾਂ ਦੇ ਮੰਤਰੀ ਅਤੇ ਸੀਨੀਅਰ ਨੁਮਾਇੰਦੇ ਊਰਜਾ ਸੁਰੱਖਿਆ, ਟਿਕਾਊਪਨ, ਪਹੁੰਚਯੋਗਤਾ ਅਤੇ ਬਦਲਦੇ ਗਲੋਬਲ ਊਰਜਾ ਦ੍ਰਿਸ਼ ਨਾਲ ਸਬੰਧਤ ਨਾਲ ਮੁੱਖ ਮੁੱਦਿਆਂ ‘ਤੇ ਵਿਚਾਰ-ਵਟਾਂਦਰਾ ਕਰਨ ਲਈ ਇਕੱਠੇ ਹੋਣਗੇ। ਭਾਰਤ ਦੀ ਭਾਗੀਦਾਰੀ ਰਚਨਾਤਮਕ ਅੰਤਰਰਾਸ਼ਟਰੀ ਸਹਿਯੋਗ ਅਤੇ ਸੁਰੱਖਿਅਤ, ਭਰੋਸੇਮੰਦ, ਕਿਫ਼ਾਇਤੀ ਤੇ ਟਿਕਾਊ ਊਰਜਾ ਦੇ ਹੱਲਾਂ ਨੂੰ ਅੱਗੇ ਵਧਾਉਣ ਦੀ ਉਸ ਦੀ ਵਚਨਬੱਧਤਾ ਨੂੰ ਉਜਾਗਰ ਕਰਦੀ ਹੈ।
