ਜਲੰਧਰ ਵੈਸਟ ਦੀਆਂ ਜ਼ਿਮਨੀ ਚੋਣਾਂ ”ਚ ਦਿਖਣਗੇ ਨਵੇਂ ਉਮੀਦਵਾਰ
ਜਲੰਧਰ – (ਅਰਸ਼ਦੀਪ)ਪੰਜਾਬ ਸਰਕਾਰ ਨੇ ਵੈਸਟ ਵਿਧਾਨ ਸਭਾ ਖੇਤਰ ਤੋਂ ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਰਹੇ ਸ਼ੀਤਲ ਅੰਗੁਰਾਲ ਦਾ ਅਸਤੀਫਾ ਸਵੀਕਾਰ ਕਰ ਲਿਆ ਹੈ। ਇਸ ਲਈ ਮੰਨਿਆ ਜਾ ਰਿਹਾ ਹੈ ਕਿ ਅਗਲੇ ਕੁਝ ਮਹੀਨਿਆਂ ਅੰਦਰ ਵੈਸਟ ਵਿਧਾਨ ਸਭਾ ਖੇਤਰ ਜਲੰਧਰ ਦੀ ਜ਼ਿਮਨੀ ਚੋਣ ਕਰਵਾਈ ਲਈ ਜਾਵੇਗੀ। ਉਂਝ ਸਰਕਾਰ ਨੇ ਕੁਝ ਹੋਰ ਵਿਧਾਨ ਸਭਾ ਸੀਟਾਂ ’ਤੇ ਵੀ ਜ਼ਿਮਨੀ ਚੋਣਾਂ ਕਰਵਾਉਣੀਆਂ ਹਨ। ਇਸ ਲਈ ਕਿਹਾ ਜਾ ਰਿਹਾ ਹੈ ਕਿ ਇਹ ਪ੍ਰਕਿਰਿਆ ਜਲਦੀ ਸ਼ੁਰੂ ਕਰ ਦਿੱਤੀ ਜਾਵੇਗੀ। ਜਲੰਧਰ ਵੈਸਟ ਵਿਧਾਨ ਸਭਾ ਖੇਤਰ ਦੀ ਗੱਲ ਕਰੀਏ ਤਾਂ ਇੱਥੇ ਪਿਛਲੇ ਇਕ 2 ਸਾਲ ਤੋਂ ਸਮੀਕਰਨ ਬੜੀ ਤੇਜ਼ੀ ਨਾਲ ਬਦਲੇ ਹਨ।
ਸ਼ੀਤਲ ਅੰਗੁਰਾਲ ਕਦੇ ਭਾਜਪਾ ’ਚ ਹੋਇਆ ਕਰਦੇ ਸਨ ਪਰ ਉਹ ਆਮ ਆਦਮੀ ਪਾਰਟੀ ਦੀ ਟਿਕਟ ਨਾਲ ਵਿਧਾਇਕ ਬਣ ਗਏ ਅਤੇ ਬਾਅਦ ’ਚ ਉਨ੍ਹਾਂ ਨੇ ਭਾਜਪਾ ਜੁਆਇੰਨ ਕਰ ਲਈ ਤੇ ਆਪਣਾ ਅਸਤੀਫਾ ਵੀ ਸੌਂਪ ਦਿੱਤਾ। ਇਥੋਂ ਵਿਧਾਇਕ ਦੀ ਚੋਣ ਸੁਸ਼ੀਲ ਰਿੰਕੂ ਹਾਰੇ ਸਨ ਤੇ ਉਹ ਕਾਂਗਰਸ ’ਚ ਸਨ ਪਰ ਬਾਅਦ ’ਚ ਉਹ ਆਮ ਆਦਮੀ ਪਾਰਟੀ ’ਚ ਚਲੇ ਗਏ ਤੇ ਲੋਕ ਸਭਾ ਦੀਆਂ ਉਪ ਚੋਣਾਂ ਜਿੱਤ ਸੰਸਦ ਮੈਂਬਰ ਬਣ ਗਏ। ਲੋਕ ਸਭਾ ਦੀਆਂ ਚੋਣਾਂ ਦੌਰਾਨ ਵੀ ਆਪ ਨੇ ਸੁਸ਼ੀਲ ਰਿੰਕੂ ’ਤੇ ਦਾਅ ਖੇਡਿਆ ਪਰ ਇਸੇ ਦੌਰਾਨ ਉਹ ਭਾਜਪਾ ’ਚ ਚਲੇ ਗਏ ਤੇ ਉਸ ਪਾਰਟੀ ਦੀ ਟਿਕਟ ’ਤੇ ਚੋਣ ਲੜੀ ਪਰ ਹਾਰ ਗਏ। ਹੁਣ ਵੈਸਟ ਖੇਤਰ ਦੀਆਂ ਉਪ ਚੋਣਾਂ ’ਚ ਨਵੇਂ-ਨਵੇਂ ਉਮੀਦਵਾਰ ਦੇਖਣ ਨੂੰ ਮਿਲ ਸਕਦੇ ਹਨ। ‘ਆਪ’ ਵੱਲੋਂ ਟਿਕਟ ਦੇ ਦਾਅਵੇਦਾਰ ਮਹਿੰਦਰ ਭਗਤ ਹੋ ਸਕਦੇ ਹੈ, ਜੋ ਕਦੇ ਭਾਜਪਾਈ ਹੋਇਆ ਕਰਦੇ ਹਨ। ਕਾਂਗਰਸ ਵੱਲੋਂ ਦਾਅਵੇਦਾਰ ਕੌਣ ਹੋਵੇਗਾ ਇਸ ਬਾਰੇ ਹੁਣ ਸਥਿਤੀ ਸਪੱਸ਼ਟ ਨਹੀਂ ਹੈ। ਭਾਜਪਾ ਵੱਲੋਂ ਇਸ ਉਪ ਚੋਣਾਂ ’ਚ ਕਿਸੇ ਨੂੰ ਟਿਕਟ ਮਿਲੇਗੀ, ਇਸ ਬਾਰੇ ਵੀ ਅਜੇ ਕੋਈ ਅੰਦਾਜ਼ਾ ਨਹੀਂ ਹੈ। ਇਸ ਉਪ ਚੋਣਾਂ ਨੂੰ ਲੈ ਕੇ ਫਿਲਹਾਲ ਕਿਸੇ ਪਾਰਟੀ ਨੇ ਅਜੇ ਪੱਤੇ ਨਹੀਂ ਖੋਲ੍ਹੇ ਹਨ ਪਰ ਮੰਨਿਆ ਜਾ ਰਿਹਾ ਹੈ ਕਿ ਜਲਦੀ ਹੀ ਵੈਸਟ ਵਿਧਾਨ ਸਭਾ ਖੇਤਰ ਦੀ ਸਿਆਸਤ ’ਚ ਸਰਗਰਮੀ ਸ਼ੁਰੂ ਹੋੇ ਜਾਵੇਗੀ। ਉਂਝ ਲੋਕ ਸਭਾ ਚੋਣਾਂ ਦੌਰਾਨ ਵੈਸਟ ਖੇਤਰ ਤੋਂ ਕਾਂਗਰਸ ਨੂੰ ਬਾਕੀ ਦਲਾਂ ਦੇ ਮੁਕਾਬਲੇ ਮਾਮੂਲੀ ਵਾਧਾ ਪ੍ਰਾਪਤ ਹੋਈ ਹੈ ਤੇ ਕਾਂਗਰਸੀ ਇਥੋਂ ਸਰਗਰਮ ਹੋ ਚੁੱਕੇ ਹਨ।
ਨਿਗਮ ਚੋਣਾਂ ਦੀਆਂ ਟਿਕਟਾਂ ਨੂੰ ਲੈ ਕੇ ਚੱਕਰਵਿਊ ’ਚ ਫਸੇ ਹੋਏ ਹਨ ਸਾਰੀਆਂ ਪਾਰਟੀ ਦੇ ਆਗੂ
ਜਲੰਧਰ ’ਚ ਪਿਛਲੇ ਸਾਲ ਜਦੋਂ ਲੋਕ ਸਭਾ ਦੀਆਂ ਉਪ ਚੋਣਾਂ ਹੋਏ ਸਨ ਉਹ ਉਦੋਂ ਚੋਣਾਂ ਜਿੱਤਣ ਤੋਂ ਬਾਅਦ ‘ਆਪ’ ਨੇ ਪੰਜਾਬ ’ਚ ਨਗਰ ਨਿਗਮਾਂ ਦੀਆਂ ਚੋਣਾਂ ਕਰਵਾਉਣ ਦਾ ਮਨ ਬਣਾ ਲਿਆ ਸੀ, ਜਿਸ ਲਈ ਵਾਰਡਬੰਦੀ ਦੀ ਪ੍ਰਕਿਰਿਆ ਨੂੰ ਵੀ ਫਾਈਨਲ ਟੱਚ ਦੇ ਦਿੱਤਾ ਗਿਆ ਸੀ। ਉਦੋਂ ਮੰਨਿਆ ਜਾ ਰਿਹਾ ਹੈ ਕਿ ਉਪ ਚੋਣਾਂ ਖਤਮ ਹੋਣ ਦੇ 2 ਮਹੀਨੇ ਦੇ ਅੰਦਰ ਨਿਗਮਾਂ ਦੀਆਂ ਚੋਣਾਂ ਕਰਵਾ ਲਈਆਂ ਜਾਣਗੀਆਂ ਪਰ ਅਜਿਹਾ ਹੋ ਨਹੀਂ ਸਕਿਆ ਤੇ ਸਰਕਾਰ ਨੇ ਆਮ ਚੋਣਾਂ ਦੀਆਂ ਤਿਆਰੀਆਂ ਸ਼ੁਰੂ ਕਰ ਦਿੱਤੀ ਹੈ।
ਹੁਣ ਲੋਕ ਸਭਾ ਦੀਆਂ ਚੋਣਾਂ ਵੀ ਸੰਪੰਨ ਹੋ ਚੁੱਕੇ ਹਨ ਇਸ ਦੇ ਬਾਵਜੂਦ ਨਿਗਮ ਚੋਣਾਂ ਨੂੰ ਲੈ ਕੇ ਅਨਿਸ਼ਚਿਤਤਾ ਬਰਕਰਾਰ ਹੈ। ਜਲੰਧਰ ਨਗਰ ਨਿਗਮ ਦੀ ਗੱਲ ਕਰੀਏ ਤਾਂ ਪਿਛਲੇ 2 ਸਾਲਾਂ ਦੌਰਾਨ ਜਲੰਧਰ ਦੀ ‘ਆਪ’ ਦੀ ਅਗਵਾਈ ’ਚ ਕਈ ਉਤਰਾਅ-ਚੜ੍ਹਾਅ ਆਏ ਹਨ, ਜਿਨ੍ਹਾਂ ਆਗੂਆਂ ਦੀ ਕਦੇ ਤਾਰੀਫ਼ ਕੀਤੀ ਜਾਂਦੀ ਸੀ, ਉਹ ਹੁਣ ਸਭ ਤੋਂ ਹੇਠਲੇ ਪੱਧਰ ‘ਤੇ ਆ ਗਏ ਹਨ, ਜਦੋਂ ਕਿ ਕਈ ਉੱਚੇ ਸਿਖਰ ’ਤੇ ਪਹੁੰਚ ਗਏ ਹਨ।
ਅਜਿਹੇ ’ਚ ਜਲੰਧਰ ਨਿਗਮ ਦੀਆਂ ਟਿਕਟਾਂ ਦੀ ਦਾਅਵੇਦਾਰੀ ਨੂੰ ਲੈ ਕੇ ‘ਆਪ’ ਦੇ ਜ਼ਿਆਦਾਤਰ ਆਗੂ ਉਮੀਦ ਤੇ ਨਿਰਾਸ਼ਾ ਦੇ ਚੱਕਰ ‘ਚ ਫਸੇ ਨਜ਼ਰ ਆ ਰਹੇ ਹਨ। ‘ਆਪ’ ਦੇ ਬਦਲਦੇ ਸਮੀਕਰਨਾਂ ਨੂੰ ਦੇਖਦਿਆਂ ਕਈ ਲੀਡਰਾਂ ਨੂੰ ਖੇਮੇ ਬਦਲਣ ਲਈ ਮਜਬੂਰ ਹੋਣਾ ਪਿਆ ਹੈ ਅਤੇ ਕਈ ਟਿਕਟਾਂ ਦੇ ਜਥੇਬੰਦ ਹੋਣ ਲਈ ਨਵੇਂ ਗਾਡਫਾਦਰਾਂ ਦੀ ਤਲਾਸ਼ ’ਚ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਆਉਣ ਵਾਲੇ ਦਿਨਾਂ ’ਚ ਨਿਗਮ ਦੀਆਂ ਟਿਕਟਾਂ ਨੂੰ ਲੈ ਕੇ ‘ਆਪ’ ’ਚ ਕਾਫੀ ਹੰਗਾਮਾ ਹੋ ਸਕਦਾ ਹੈ, ਕਿਉਂਕਿ ਟਿਕਟਾਂ ਦੀ ਵੰਡ ਦੀ ਜ਼ਿੰਮੇਵਾਰੀ ਕਿਸ ਦੀ ਹੋਵੇਗੀ, ਇਹ ਸਮਝ ਨਹੀਂ ਆ ਰਹੀ ਹੈ।
ਵਾਰਡਬੰਦੀ ਨੂੰ ਲੈ ਕੇ ਕਾਂਗਰਸੀ ਸਭ ਤੋਂ ਵੱਧ ਸਰਗਰਮ ਰਹੇ
ਜਲੰਧਰ ਨਿਗਮ ਦੀ ਵਾਰਡਬੰਦੀ ਦਾ ਖਰੜਾ ਨੋਟੀਫਾਈ ਕਰ ਦਿੱਤਾ ਗਿਆ ਹੈ ਤੇ ਸਾਰੇ ਵਾਰਡਾਂ ਦੇ ਨਕਸ਼ੇ ਵੀ ਪ੍ਰਦਰਸ਼ਿਤ ਕੀਤੇ ਗਏ ਹਨ। ਪਿਛਲੇ ਸਮੇਂ ਦੌਰਾਨ ਦੇਖਿਆ ਗਿਆ ਹੈ ਕਿ ਵਾਰਡਬੰਦੀ ਨੂੰ ਲੈ ਕੇ ਕਾਂਗਰਸ ਦੀਆਂ ਟਿਕਟਾਂ ਦੇ ਦਾਅਵੇਦਾਰ ਸਭ ਤੋਂ ਵੱਧ ਸਰਗਰਮ ਰਹੇ ਹਨ, ਜਦਕਿ ਇਸ ਮਾਮਲੇ ’ਚ ‘ਆਪ’ ਦੇ ਨਾਲ-ਨਾਲ ਅਕਾਲੀ ਤੇ ਭਾਜਪਾ ਦੀਆਂ ਟਿਕਟਾਂ ਦੇ ਦਾਅਵੇਦਾਰ ਵੀ ਕਾਫੀ ਪੱਛੜ ਰਹੇ ਹਨ।
