ਹਾਸ ਰਸ ਕਲਾਕਾਰ ਜਸਵਿੰਦਰ ਭੱਲਾ ਦੀ ਹੋਈ ਬੇਵਕਤੀ ਮੌਤ ਨੇ ਪੂਰੇ ਭਾਰਤ ਨੂੰ ਝੰਜੋੜ ਕੇ ਰੱਖ ਦਿੱਤਾ  : ਟੇਰਕਿਆਨਾ

ਹੁਸ਼ਿਆਰਪੁਰ 22 ਅਗਸਤ ( ਤਰਸੇਮ ਦੀਵਾਨਾ ) ਪ੍ਰਸਿੱਧ ਲੇਖਕ ਰਘਵੀਰ ਸਿੰਘ ਟੇਰਕਿਆਨਾ ਨੇ ਹਾਸ ਰਸ ਕਲਾਕਾਰ ਜਸਵਿੰਦਰ ਭੱਲਾ ਦੀ ਹੋਈ ਬੇਵਕਤੀ ਮੌਤ ਤੇ ਦੁੱਖ ਦਾ ਪ੍ਰਗਟਾਵਾ ਕਰਦੇ ਹੋਏ ਕਿਹਾ ਕਿ ਸਾਡੇ ਲੋਕਾਂ ਨੂੰ ਗੱਲਾਬਾਤਾ ਨਾਲ ਹਾਸੇ,ਖੇੜੇ ਤੇ ਖੁਸ਼ੀਆਂ ਵੰਡਣ ਵਾਲੇ ਜਸਵਿੰਦਰ ਭੱਲਾ ਦੀ ਮੌਤ ਨੇ ਦੁਨੀਆ ਭਰ ਵਿਚ ਰਹਿੰਦੇ ਪੰਜਾਬੀ ,ਹਿੰਦੀ ਤੇ ਉਰਦੂ ਭਾਸ਼ਾ ਵਾਲੇ ਲੋਕਾਂ ਨੂੰ ਉਦਾਸ ਕਰ ਕੇ ਰੱਖ ਦਿੱਤਾ ਹੈ । ਟੇਰਕਿਆਨਾ ਨੇ ਦੱਸਿਆ ਜਸਵਿੰਦਰ ਭੱਲਾ ਨੇ ਮਜ਼ਾਕੀਆ ਲਹਿਜੇ ਵਾਲੀ  ਕਲਾ ਕਿਤਿਓ ਸਿੱਖੀ ਨਹੀਂ ਸੀ  ਬਲਕਿ ਉਸ ਨੂੰ ਖੁਦ ਨੂੰ ਹੀ ਆਉਂਦੀ ਸੀ । ਉਸ ਨੂੰ ਲੋਕਾਂ ਦੀ ਮਾਨਸਿਕਤਾ ਦਾ ਪਤਾ ਹੁੰਦਾ ਸੀ ਤੇ ਏਸੇ ਲਈ ਉਸ ਨੂੰ ਹਰ ਵਰਗ ਦੇ ਲੋਕ ਪਸੰਦ ਕਰਦੇ ਸਨ ਕਿਉਕਿ ਉਹ ਰੋਦਿਆਂ ਨੂੰ ਹਸਾਉਣ ਦੀ ਕਲਾ ਜਾਣਦਾ ਸੀ । ਟੇਰਕਿਆਨਾ ਨੇ ਕਿਹਾ ਕਿ ਅੱਜ ਉਸ ਦੀ ਹੋਈ ਬੇਵਕਤੀ ਮੌਤ ਦੇ ਸੋਗ ਵਿਚ ਸਮੁੱਚੇ ਦੇਸ਼ ਤੇ ਵਿਦੇਸ਼ਾਂ ਵਿੱਚ  ਉਸ ਦੇ ਪ੍ਰਸ਼ੰਸਕ ਜਸਵਿੰਦਰ ਭੱਲਾ ਦੀ ਹੋਈ ਮੌਤ ਨਾਲ ਘੋਰ ਨਿਰਾਸ਼ਾ ਵਿੱਚ  ਹਨ । ਉਹਨਾਂ ਕਿਹਾ ਕਿ  ਫਿਲਮ ਨਗਰੀ ਦੇ ਚਿਹਰੇ ਵੀ ਉੱਤਰੇ ਉੱਤਰੇ  ਨਜ਼ਰ ਆ ਰਹੇ ਹਨ  ਤੇ ਉਸ ਦੇ ਟੈਲੀਵੀਜ਼ਨ ਵਾਲੇ ਤਮਾਮ ਸਾਥੀ ਵੀ ਰੋਣਹਾਕੇ ਹੋਏ ਪਏ ਹਨ । ਉਹਨਾਂ ਕਿਹਾ ਕਿ ਮਿਹਰ ਮਿੱਤਲ ਤੋ ਬਾਦ ਜਸਵਿੰਦਰ ਭੱਲਾ , ਘੁੱਗੀ ਅਤੇ ਭਗਵੰਤ ਮਾਨ ਨੇ ਲੋਕਾਂ ਨੂੰ ਆਪਣੀ ਹਾਸ ਰਸ ਵਾਲੀ ਕਲਾ ਨਾਲ ਬਹੁਤ ਪ੍ਰਭਾਵਿਤ ਕੀਤਾ ਤੇ ਅੱਜ ਉਸ ਦੇ ਸੰਘੀ ਸਾਥੀ ਵੀ ਉਸ ਦੇ ਵਿਛੋੜੇ ਦਾ ਦਰਦ ਮਹਿਸੂਸ ਕਰ ਰਹੇ ਹੋਣਗੇ ।ਟੇਰਕਿਆਨਾ ਨੇ ਕਿਹਾ ਕਿ ਨਿਰਾਸ਼ਾ ਦੇ ਦੌਰ ਵਿੱਚ ਹਾਸੇ ਵੰਡਣੇ ਏਡਾ ਅਸਾਨ ਕੰਮ ਵੀ ਨਹੀਂ ਹੈ ਤੇ ਇਹ ਕੰਮ ਜਸਵਿੰਦਰ ਭੱਲਾ ਵਰਗੇ ਚੰਦ ਲੋਕਾਂ ਦੇ ਹੀ ਹਿੱਸੇ ਆਇਆ ਹੈ ।