FASTAG:ਦੇਸ਼ ਵਿੱਚ ਨੈਸ਼ਨਲ ਹਾਈਵੇ ਤੇ ਸਫਰ ਕਰਨਾ ਹੋਇਆ ਹੋਰ ਵੀ ਮੁਸ਼ਕਿਲ, ਫਾਸਟ ਟੈਗ ਦੀਆਂ ਵਧਣਗੀਆਂ ਕੀਮਤਾਂ
ਨਵੀਂ ਦਿੱਲੀ /15 ਮਾਰਚ 2026-/ਰੋਜ਼ਾਨਾਂ ਰਿਪੋਰਟਰ
ਦੇਸ਼ ਭਰ ਦੇ ਨੈਸ਼ਨਲ ਹਾਈਵੇਅ ‘ਤੇ ਸਫ਼ਰ ਕਰਨ ਵਾਲੇ ਨਿੱਜੀ ਵਾਹਨ ਮਾਲਕਾਂ ਲਈ ਅਹਿਮ ਖ਼ਬਰ ਹੈ। ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ਼ ਇੰਡੀਆ (NHAI) ਨੇ ਵਿੱਤੀ ਸਾਲ 2026-27 ਲਈ FASTag ਐਨੂਅਲ ਪਾਸ (ਸਾਲਾਨਾ ਪਾਸ) ਦੀ ਫੀਸ ਵਿੱਚ ਵਾਧਾ ਕਰਨ ਦਾ ਫੈਸਲਾ ਕੀਤਾ ਹੈ। ਹੁਣ ਵਾਹਨ ਮਾਲਕਾਂ ਨੂੰ ਇਸ ਪਾਸ ਲਈ 3,000 ਰੁਪਏ ਦੀ ਬਜਾਏ 3,075 ਰੁਪਏ ਅਦਾ ਕਰਨੇ ਪੈਣਗੇ।ਸੜਕੀ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲੇ ਅਨੁਸਾਰ ਨਵੀਆਂ ਦਰਾਂ 1 ਅਪ੍ਰੈਲ 2026 ਤੋਂ ਲਾਗੂ ਹੋਣਗੀਆਂ। ਇਹ ਵਾਧਾ ਸਿਰਫ਼ ਗੈਰ-ਵਪਾਰਕ (ਪ੍ਰਾਈਵੇਟ) ਵਾਹਨਾਂ (ਕਾਰਾਂ, ਜੀਪਾਂ, ਵੈਨਾਂ) ‘ਤੇ ਲਾਗੂ ਹੋਵੇਗਾ ਜਿਨ੍ਹਾਂ ਕੋਲ ਵੈਧ FASTag ਹੈ। ਇਹ ਸਹੂਲਤ ਦੇਸ਼ ਭਰ ਦੇ ਲਗਭਗ 1,150 ਟੋਲ ਪਲਾਜ਼ਿਆਂ ‘ਤੇ ਉਪਲਬਧ ਹੈ।
FASTag ਐਨੂਅਲ ਪਾਸ ਯੋਜਨਾ, ਜੋ ਕਿ 15 ਅਗਸਤ 2025 ਨੂੰ ਸ਼ੁਰੂ ਕੀਤੀ ਗਈ ਸੀ, ਨਿੱਜੀ ਵਾਹਨ ਮਾਲਕਾਂ ਵਿੱਚ ਕਾਫ਼ੀ ਮਕਬੂਲ ਹੋ ਰਹੀ ਹੈ। ਇੱਕ ਵਾਰ ਫੀਸ ਦੇਣ ਤੋਂ ਬਾਅਦ ਵਾਹਨ ਮਾਲਕਾਂ ਨੂੰ ਸਾਲ ਭਰ ਵਾਰ-ਵਾਰ ਟੋਲ ਰੀਚਾਰਜ ਕਰਨ ਦੀ ਲੋੜ ਨਹੀਂ ਪੈਂਦੀ। ਇਹ ਪਾਸ ਇੱਕ ਸਾਲ ਲਈ ਜਾਂ 200 ਵਾਰ ਟੋਲ ਪਲਾਜ਼ਾ ਪਾਰ ਕਰਨ ਤੱਕ (ਜੋ ਵੀ ਪਹਿਲਾਂ ਹੋਵੇ) ਮਾਨਤਾ ਪ੍ਰਾਪਤ ਹੁੰਦਾ ਹੈ।
ਵਾਹਨ ਮਾਲਕ Rajmarg Yatra ਐਪ ਜਾਂ NHAI ਦੀ ਅਧਿਕਾਰਤ ਵੈੱਬਸਾਈਟ ਰਾਹੀਂ ਫੀਸ ਭਰ ਸਕਦੇ ਹਨ। ਭੁਗਤਾਨ ਦੇ 2 ਘੰਟੇ ਦੇ ਅੰਦਰ ਪਾਸ ਐਕਟਿਵ ਹੋ ਜਾਂਦਾ ਹੈ।
ਮੰਤਰਾਲੇ ਅਨੁਸਾਰ, ਇਹ ਬਦਲਾਅ ‘ਨੈਸ਼ਨਲ ਹਾਈਵੇਅ ਫੀਸ (ਦਰ ਨਿਰਧਾਰਨ ਅਤੇ ਵਸੂਲੀ) ਨਿਯਮ, 2008’ ਦੇ ਤਹਿਤ ਤੈਅ ਕੀਤੇ ਗਏ ਨਿਯਮਾਂ ਅਨੁਸਾਰ ਕੀਤਾ ਗਿਆ ਹੈ। ਮੌਜੂਦਾ ਸਮੇਂ ਵਿੱਚ ਦੇਸ਼ ਵਿੱਚ 56 ਲੱਖ ਤੋਂ ਵੱਧ ਲੋਕ ਇਸ ਸਹੂਲਤ ਦਾ ਲਾਭ ਉਠਾ ਰਹੇ ਹਨ।
